O myslimanë të nderuar!
Në librin e Allahut të Madhëruar, Kuranin famëlartë, gjenden tregime të mbushura me urtësi dhe mësime. Ndër këto tregime është edhe historia e As’hab el-ukhdud (banorët e hendekut). Në ajetet e ndritura me të cilat e nisa këtë hytbe, Allahu i Madhëruar e përshkruan këtë popull të padrejtë me fjalët e Tij:
“I mjerë qoftë populli i hendeqeve, zjarri me lëndën djegëse! Kur ata ishin ulur pranë tij, duke parë atë që bënin me besimtarët. Ata nuk i urrenin ata për tjetër veçse sepse besonin në Allahun, të Plotfuqishmin, të Lavdëruarin. Atij i përket pushteti i qiejve dhe i tokës, dhe Allahu është dëshmitar për çdo gjë. Vërtet ata që i kanë përndjekur besimtarët dhe besimtaret, e pastaj nuk janë penduar, për ta ka ndëshkimin e Xhehenemit dhe dënimin e zjarrit përvëlues”. (Sure El-Buruxh: 4-10)[i]
O besimtarë të nderuar!
Sot, banorët e hendeqeve janë sionistët shtypës. Këta kriminelë të frikësuar po kryejnë në Gaza masakrat më të tmerrshme të historisë, pa bërë dallim mes grave, fëmijëve dhe të moshuarve. Ata sfidojnë gjithë botën dhe lënë vëllezërit tanë të vuajnë nga uria dhe etja, duke i rrethuar deri në vdekje, pa asnjë mëshirë. Ata i detyrojnë të zgjedhin një nga dy opsionet: të dorëzohen ose të largohen nga vendi i tyre.
Por, ne nuk duhet të harrojmë se edhe nëse zullumqarët thurin planet e tyre, Allahu i Madhëruar ua shkatërron të gjitha kurthet. Edhe nëse pushtuesit vizatojnë hartat e tyre, përfundimi dhe fati janë vetëm në dorën e Allahut.
O myslimanë të ndershëm!
Që nga kohët e lashta e deri më sot, besimtarët u janë nënshtruar llojeve të shumta të padrejtësisë. Sa shumë profetë, dhe ata që besuan me ta, u rrethuan nga të padrejtët dhe u përballën me tortura dhe përndjekje të dhimbshme.
Edhe sot, një pjesë e besimtarëve në Gaza po vazhdojnë qëndresën me besim, durim dhe dinjitet, duke u përballur me sionistët shtypës dhe të gjitha forcat e së keqes që i mbështesin ata në botë. Allahu i Madhëruar ka thënë në Librin e Tij të qartë:
“Sa e sa grupe të vogla kanë mundur grupe të mëdha me lejen e Allahut. Dhe Allahu është me durimtarët”. (Sure El-Bekare: 249)[ii]
Po, historia është dëshmitare për këtë: Nemrudi humbi, ndërsa Ibrahimi fitoi; faraoni humbi, ndërsa Musai fitoi; Ebu Xhehli dhe Ebu Lehebi humbën, ndërsa Muhamedi ﷺ dhe umeti i tij fituan.
Edhe sot, me lejen e Allahut, vëllezërit tanë në Gaza do të fitojnë, ndërsa të padrejtët dhe ata që i mbështesin ata do të humbasin, medoemos. Le t’u mjaftojë atyre fjala e Zotit tonë të Madhëruar:
“Vërtet, ndëshkimi i Zotit tënd është i ashpër”. (Sure El-Buruxh: 12)[iii]
Këta kriminelë do të kenë të njëjtin fund si Adi, Themudi, populli i Lutit dhe të gjitha kombet që u shkatërruan për shkak të padrejtësisë dhe kryeneçësisë së tyre. Mallkimi i Allahut, i melekëve, i të gjithë njerëzve dhe i çdo krijese në këtë univers është mbi ta dhe mbi veprat e tyre të këqija. Premtimi i Allahut është i vërtetë dhe fjala e Tij është e saktë:
“Thuaju atyre që mohuan: Do të mundeni dhe do të grumbulloheni për në Xhehenem, dhe sa shtrat i keq është ai!” (Sure Ali Imran: 12)[iv]
O besimtarë të ndershëm!
Gaza sot nuk është vetëm një provë për myslimanët, por është një sprovë për të gjithë njerëzimin. Gaza është testi i dinjitetit të njerëzimit dhe provë për ndërgjegjen e tij të gjallë.
Prandaj, çdo njeri, çfarëdo feje, race apo ngjyre të ketë, duhet të qëndrojë kundër kësaj padrejtësie të tmerrshme dhe të punojë me gjithë fuqinë e tij për ta bërë botën tonë një oazë paqeje dhe një vend sigurie e qetësie. Nëse bota nuk e kryen detyrën e saj, askush nuk do të jetë i sigurt në këtë botë.
Në hadithin e ndritur me të cilin e nisa këtë hytbe, Pejgamberi ynë ﷺ ka thënë:
“Kur njerëzit e shohin një zullumqar dhe nuk i ndalin duart e tij, atëherë është shumë afër që Allahu t’i përfshijë të gjithë me një ndëshkim nga Ai”. (Ebu Davudi, Tirmidhiu)[v]
O myslimanë të nderuar!
Populli ynë fisnik, që nga kohët e lashta, gjithmonë e ka konsideruar nder dhe përgjegjësi qëndrimin kundër të padrejtit dhe ndihmën ndaj të shtypurit. Kudo që ka pasur një lot apo një të lënduar, ai ka ofruar mëshirën e tij dhe ka shtrirë dorën e ndihmës. Falënderimi i qoftë Allahut për këtë!
Sot, populli ynë i bashkuar mbi të drejtën, i lidhur me një zemër, po vazhdon me gjithë forcën dhe sinqeritetin e tij përpjekjet për të ngushëlluar të shtypurit, dhe në krye të tyre vëllezërit tanë të duruar në Gaza, duke vënë në shërbim të gjitha mundësitë e tij për të shëruar plagët e tyre.
Në një botë ku mbizotëron padrejtësia dhe dhuna, ku përhapen tradhtia dhe armiqësia, detyra jonë si besimtarë është të marrim forcë në çdo fushë dhe ta bëjmë fjalën e Allahut tonë të Madhëruar moton tonë:
“Dhe përgatituni për ta me sa të mundeni nga forca”. (Sure El-Enfal: 60)[vi]
Duhet të forcohemi në dije, në teknologji, në ekonomi, në moral, si në shpirt ashtu edhe në trup. Gjithashtu, duhet të ruajmë unitetin tonë, të shmangim çdo lloj përçarjeje dhe grindjeje, të mos dobësohemi dhe të mos mërzitemi, por të shtojmë ndihmën dhe lutjet tona për vëllezërit tanë të rrethuar, duke iu përgjigjur urdhrit të Zotit tonë të Madhëruar:
“Mos u dëshpëroni nga mëshira e Allahut”. (Sure Ez-Zumer: 53)[vii]
Por, o vëllezër, vetëm lutja dhe ndihma nuk mjaftojnë. Nga besimi dhe njerëzimi ynë kemi detyrimin të bojkotojmë produktet që mbështesin ekonominë e të padrejtëve, sepse zgjedhja në blerje nuk është vetëm tregtare, por është një qëndrim moral dhe një dëshmi ndërgjegjeje.
Të mos harrojmë: të shtypurit e lirë dhe njerëzit me ndërgjegje të gjallë në këtë tokë do të jenë shkak për humbjen e të padrejtëve dhe fitoren e besimtarëve, me lejen e Zotit të botëve.
O besimtarë të nderuar!
Po kalojmë këto periudhat më të thata dhe më të ashpra të verës. Të kemi frikë Allahun në mjedisin tonë, në pyjet tona dhe në atë që na është besuar. Ju lutem! Mos ndizni zjarre në zonat pyjore, mos hidhni mbeturina, shishe qelqi dhe të ngjashme në pyje ose buzë rrugëve! Një pakujdesi e vogël mund të shkaktojë dëmtimin e mijëra hektarëve pyje dhe zhdukjen e qindra qenieve të gjalla.
Në përballje me këto zjarre, dëshmorë bëhen heronjtë tanë, ata që sakrifikojnë jetën për të shuar zjarrin dhe për të shpëtuar jetë. Me këtë rast, unë shpreh mirënjohjen dhe lutjet e mia për secilin prej tyre, duke iu lutur Allahut që t’i shpërblejë me të mirat e Tij të pafundme.
Allahu ynë i Madhëruar, na bëj prej atyre që e ndihmojnë fenë Tënde me çdo mundësi! Na mbro nga padrejtësia dhe nga zullumqarët! Na forco në unitet dhe mos e lër të thyhet vëllazëria jonë!
Na bëj prej atyre që ndihmojnë të shtypurit dhe që mbrojnë të pambrojturit kudo në botë!
[i] Sure El-Buruxh, 85/4-10.
[ii] Sure El-Bekare, 2/249.
[iii] Sure El-Buruxh, 85/12.
[iv] Sure Ali Imran, 3/12.
[v] Tirmidhiu, Libri i Tefsirit të Kuranit, nr. 5.
[vi] Sure El-Enfal, 8/60.
[vii] Sure Ez-Zumer, 39/53.